舊年法國街頭藝術家Invader喺香港做咗唔少作品，但好快被路政署拆走。噚日「法國五月」宣佈五月一至十七日喺PMQ有Invader "WIPE OUT" 殲滅展覽，個介紹好抵死，話香港係好特別嘅地方，清潔工好快咁清走近九成作品，於是為呢個咁奇怪嘅措施命名WIPE OUT，重現所有在港作品。
作品五月重現
法國駐港總領事館負責文化項目嘅蔡穎話，呢個展係Invader首個亞洲展，有約五十件作品，Invader會用港式藥房霓虹燈、李小龍功夫為題創作。
佢啲作品全部都一式兩份，一份貼喺街、一份攞去賣，今次五月展出攞去賣嘅版本，所以早前被政府拆走嘅作品，又有得再睇。
幫「法國五月」宣傳嘅林嘉欣上個月跟住Invader遊巴黎，了解佢嘅創作，引述Invader話全球只有香港移除佢嘅作品，嘉欣BB對此感到可惜。民政事務局副局長許曉暉噚日出席記者會時，被問到政府應否保留Invader作品時只稱：「到時會去PMQ欣賞展覽，希望圓滿成功。」