連續第二年舉辦「饑饉三十日」支持宣明會的大家樂（341），行政總裁（CEO）羅開光（Sunny）噚日興致勃勃介紹呢項活動，點知俾記者一大堆財經問題搞到冇晒癮，有一剎那仲扁晒嘴咁要求記者，「你哋問多啲饑饉三十嘅事，唔好成日問財經喇！」
冇計喇，最近每個星期日都有反水貨活動，大家自然關心大家樂嘅生意有冇受到影響，實會追住問。不過，羅開光似乎好快感到後悔，叫完記者唔好問財經嘢之後，隔咗一陣就自言自語話，「哎呀，我其實唔應該咁樣同記者講」之後就揚長而去。
大家樂舊年成功為宣明會籌到五十萬，期望今年多籌15%。由今日到四月十七日，大家到大家樂買焗豬扒飯時可以揀「全饑饉」，即捐成碟飯同三十六蚊，或者「半饑饉」，即有半碟飯食。每次參與，大家樂會額外捐十蚊，全數捐畀宣明會。