中大本周二為國學大師饒宗頤教授舉行百歲華誕祝壽晚宴，逾百二名大學人員同饒公嘅友好出席，三位前中大校長高錕、金耀基同劉遵義都有捧場，現任校長沈祖堯當然在場。
饒公同中大嘅情緣超越一個甲子，來賓當晚透過錄像回顧饒公喺中大嘅片段與足迹，仲一齊唱生日歌同食蛋糕。祖堯BB更代表中大向饒公送上一條特別繡有中大校徽嘅頸巾，祝願饒公身壯力健，多福多壽。
祖堯BB話呀，「饒公學貫中西，博古通今，係備受推崇嘅國學泰斗，更係大家非常尊敬嘅『國寶』」。中大博文講座教授、沃爾夫數學獎及菲爾茲獎得主丘成桐教授嘅父親原來係饒公好友，丘成桐稱呼饒公為世伯，不時拜訪或以書信來往，當日特別為饒公創作一副對聯賀壽，由祖堯BB親書兼題贈。