【爆相爆片】【銅鑼灣總統戲院】偷食有前科嘅吳浩康（Deep），一而再，再而三挑戰女友鍾舒漫底線，背住正印狂媾女，鍾舒漫唔單止取消婚約，日前更自認單身，又將阿Deep降呢做「普通朋友」，有指鍾舒漫仲向阿Deep收番屋企鎖匙。睇嚟佢哋散硬，但讀者Sally大前晚喺銅鑼灣總統戲院附近，就透過本報「爆相爆片」踢爆佢哋假分手。
認Keep住聯絡
據讀者報料眼見佢哋過緊馬路都講到雞啄唔斷，全程都係鍾舒漫講最多，阿Deep有時仲俾鍾舒漫𠱁到笑，睇嚟佢哋普通朋友關係又升溫。
阿Deep同鍾舒漫拍拖兩年幾，兩人掟煲唔掟蓋，阿Deep諗計箍煲。大前晚九時多，阿Deep就同鍾舒漫夜遊，鍾舒漫噚日喺電話中話：「我哋𠵱家仲係朋友，呢段時間都有聯絡。」復合嗎？鍾舒漫話：「唔係唔係，冇啲咁嘅事。唔答呢個，將來嘅唔知。」一齊去邊？佢話：「我𠵱家變番正常生活，我要工作，亦都有社交，同佢keep住聯絡，就係咁，最緊要我哋清楚自己定位。」兩人𠵱家乜嘢關係？鍾舒漫答：「同之前答嘅一樣，如果我同人出去會有嘢講。」
記者噚日致電阿Deep問係咪有復合機會，佢就封嘴避談：「唔答，唔好意思，我唔講太多。」
採訪：皓騫
