成日話大台啲劇公式化，來來去去都係N角戀加BBQ大結局，我求大俠就覺得阿仙奴啲劇情仲悶！延續過去幾季嘅劇本，阿仙奴喺今屆歐聯十六強首回合輸得慘烈，次回合先識踢爭氣波，作客以2:0擊敗摩納哥，總比數賽和3:3，但都係輸作客入球出局，嚟緊又要專心爭前四同埋英足盃。
2:0贏摩納哥都要out
阿仙奴首回合主場輸1:3，周二次回合至少入到摩納哥三球先有希望，呢場兵工廠先靠基奧特開紀錄；換邊後再有禾確特射中柱，對手解圍唔遠，由艾朗藍斯射成2:0。可惜佢哋硬係入唔到第三球，兩回合踢成3:3平手，但比對手少一個作客入球，結果又一次光榮出局！
阿仙奴連續五屆歐聯十六強玩完（見附表），但近四屆都有一個現象，就係首回合輸鑊甘，次回合就好波，贏番掌聲咁講再見。
炒AC米蘭，贏摩納哥，兩戰拜仁慕尼黑不敗，有網民講笑話歐聯十六強次回合嘅阿仙奴真係世界級強隊，無敵程度同聯賽爭緊第四位嘅阿仙奴一樣咁勁！有槍迷喺網上話，原本佢係相信人定勝天，但睇得阿仙奴多，都開始信有宿命；亦有人話阿仙奴係最可信賴嘅投資公司，穩定回報，專業理財，雲格足業，智富人生喎。前槍手費林邦仲喺網上派膠，問人阿仙奴贏2:0係咪出到線，結果被人瘋狂恥笑，都唔知佢係真心定假膠。
摩納哥教練渣甸賽後插雲格冇品輸唔起：「首回合後，我打算去同雲格握手，多謝佢，但佢唔肯，我認為佢好唔尊重人，所以我喺次回合冇同佢握手。」
專心前四兼衞冕英足盃
至於阿仙奴領隊雲格就認為出局好唔抵，「我哋有五次黃金機會，但係冇運，而且同球證一啲判決有關，尤其喺上半場。你將兩回合兩隊射中目標嘅埋門比較一下，我認為只係防守犯錯較少嘅一隊出線。」另外，阿仙奴中場奧斯爾半場就同對手嘅干度比亞交換波衫，結果又俾人鬧。
一如以往熟悉嘅劇情，熟悉嘅發展，阿仙奴嚟緊又可以專注番國內比賽。佢哋下輪聯賽會作客紐卡素，而紐記幾乎冇晒中堅用，話唔定要搵右閘真馬特客串，睇嚟阿記有機會大勝以振士氣，繼續企穩喺聯賽前四位。當然，點可以唔提佢哋入到英足盃四強，對手只係雷丁，話唔定真係可以重溫舊年劇本捧盃㖭！
識睇，一定係睇足英台【英波Live】：
http://soccer.appledaily.com
http://bit.ly/engballlive