有「怪醫」稱號嘅醫學界立法會代表梁家騮一直被歸類為建制派，但佢早前語出驚人，話喺業界進行民調，逾半人反對政改「袋住先」，表明跟隨業界意向投票，令建制派譁然，佢噚日透露「中西面」（暗示中西環）方面嘅人士都搵過佢傾，但至今未能說服到佢，因為人大八．三一決定下提出嘅制度係有缺憾。
心水清嘅讀者不難發現，怪醫過去都唔多同建制共同進退，好似去年十一月建制派分別聯署撐警同譴責示威者暴力衝擊立會，佢都冇簽，當時建制議員解釋話未聯絡到佢。八方問佢係咪真係咁難搵？佢解釋通常打去人哋辦公室、覆電話時對方咁啱冇聽，有時確係因為有啲字眼唔認同嘅。