兩會已曲終人散，本周戲肉係美國聯儲局議息，關鍵係份聲明有冇刪除「耐性」字眼，香港時間周四凌晨二時揭盅。隔晚美股跌近130點，昨日港股未受影響，反跟內地A股高開高走，收報24120，升218點，突破十天線及百天線。市場認定美國加息有遲冇早，恒指料上試24300，若成功突破，可確認升勢；不過，昨日十天線插穿百天線，二十日線亦與五十日線交滙，在雙死亡交叉陰霾下，能否突破成疑。
這邊廂美國盤算幾時加息；那邊廂中國進入減息周期，仲有好多政策乜乜乜。人行行長周小川指資金進入股市亦支持實體經濟之說，加上《人民日報海外版》唱好滬指年底突破4000，無疑為A股打氣。滬指本周勢如破竹，周一上破一月二十三日高位3406，周二再破二○○九年高位3478，昨日又漲2.1%，以全日高位3577收市，續創近七年新高。在三萬億元打新資金解凍及MLF釋放五千億元流動性下，後市資金充裕。
A股強勢，帶動H指跑贏恒指，而H股金融指數就最標青。現時入市宜跟紅頂白，不妨考慮A股或中資股，尤其中資金融股。事實上，近期不乏利好消息，如中證監研究向內地銀行發證券及期貨牌照、今年取消存款利息上限、二月新增貸款增加、地方債置換、減息降準陸續有來等都利好內銀。另外，有傳養老保險基金可投資股市，就利好內險。至於券商，則受惠代客理財將合法化及深港通可望上半年獲批。
兩隻ETF仍有水位
保守投資者可揀內銀股，股息率一般有近六厘或以上；進取投資者可揀券商股，這類股票雖有基本因素支持，但炒味甚濃，高追風險唔細；至於內險股，中性之選，我一月中曾推介平保（2318），至今仍睇好。若冇乜心水股，可考慮以中資金融股為主的A股ETF，如南方A50（2822）或安碩A50（2823）。
我對中資金融股素有期待，皆因睇好A股向外資開放，今年中MSCI好大機會納入A股，其實去年已作過討論，較具規模的環球資產管理公司已開始加大對A股的配置，但仍屬少數。中長線來講，現為吸納時機。我向來有用期權買A股孖寶──南方A50、安碩A50；若不想用期權，買正股亦可。南方A50昨收14.14元，相對年初高位兼歷史高位14.78元仍有水位，短線買入具一定值博率，目標價17.6元，止蝕價12.5元；安碩A50昨收13.14元，目標價16.6元，止蝕價11.5元。
割柑人
本欄逢周四刊登