呢晚谷戰華將好勁，頭場開始坐直通車，直落連贏三場，呂卓賢同黎海榮包辦完首口孖寶；第三場四班千二米，輪到吳嘉晉爆「奀皮仔」，變成頭兩口孖寶都係華將天下。
東廐「奀皮仔」名副其實，今場玩殘落飛黨，後上最後一步氣走放甩晒之新勝馬「醉中意」，後駒最後5分鐘被落飛黨重插，由2.6落至1.7倍開跑，涉及注碼約700萬，位置更打到1.05倍。眼見「醉中意」快可放到收錢之際，好奀皮的「奀皮仔」破壞落飛黨好事，臨尾喪衝爆14倍冷win，打開今季勝門，落飛黨的700萬獨贏票輸晒。吳嘉晉踏入2015年首次幫師傅告東尼贏谷草，告仔則連續三次周中夜馬報捷，強勢保持今個月谷戰未斷纜。
「醉中意」功虧一簣，谷草千二米連捷落空，不過累積三次跑谷草一冠兩亞仲未甩Q，而潘頓季內四次策方廐新勝馬跑谷草，亦百分百入Q。今場三、四名分別係「帝飛星」同「火乘風」，四重彩派21,298元。