唔知大家有冇留意，工聯會立法會議員陳婉嫻連續三年新年前夕，都搞咗幾場獨居長者團年宴，喺酒樓筵開幾十席，搵埋特首以至司局級官員到場，同班老友記預祝新年；特首梁振英、政務司司長林鄭月娥同勞福局局長張建宗今年都有畀面撐場。
要搞咁大規模團年宴，一定用唔少錢，嫻姐透露，原來呢三年團年宴經費，都係嚟自同一位善長人翁，就係中華出入口商會會長張學修，連續三年、每年都捐五十萬畀佢。到底同張學修有乜淵源？嫻姐話聽聞佢肯捐錢，咪搵佢幫拖，估唔到一口答應，仲一連捐足三年。嫻姐笑笑口話明年團年宴決定向其他人揼心口，唔知邊個肯為嫻姐開水喉？