今日開始招股嘅新股福耀玻璃（3606），六十八歲創辦人曹德旺原來係內地知名慈善家，據「胡潤慈善榜」統計，佢由上世紀八十年代開始捐款至今，個人累積捐款五十億元人仔。
曹德旺噚日喺記者會上笑言「我很喜歡賺錢，技術還不錯」，跟住就好唔志在咁講，搵埋咁多錢，都唔知做乜，冇理由再投資玻璃生意，做其他行業又唔知做乜好，最好就係捐咗佢。佢二○一○年成立河仁慈善基金會，翌年將部份福耀股份捐落基金會，𠵱家佢同基金會一齊持有福耀嘅控股權。
唔好以為曹德旺因為膝下猶虛先至咁豪爽。佢阿仔曹暉係福耀執董兼總經理，今年四十四歲，傳聞話佢喺玻璃廠由低做起，食、住都同成班工人一齊。睇嚟曹德旺嘅教仔方法，同世界首富蓋茨、畢菲特等人同出一轍，而且同樣鍾意捐錢。