國泰航空（293）噚日公佈舊年多賺兩成，隨即喺內部宣佈，拎三千五百萬元出來派花紅，等於盈利百分之一左右，不過除開全球約兩萬名員工，每人只得兩千蚊，同舊年三月派嘅花紅金額一樣，唔少空姐朋友都呻公司孤寒，又慨嘆以前好景時曾收到等於一個月糧嘅花紅。
國泰高層解釋，雖然公司舊年盈利增加，但好大部份嘅盈利增長，來自其他部門，包括貨運站、空中餐廚等，航空業務嘅生意實際上跟前年差唔多，而計算分紅嘅方式就冇變，所以最終每人分兩千蚊，「公司上上下下，人人都係得咁多」。
查實，國泰今年大部份員工獲加薪4.5%，亦有雙糧，算係好過唔少打工仔。只能夠講，今時今日，航空生意真係唔易做。