唔少傳媒噚日繼續喺禮賓府外守候，想了解齊昕最新狀況，但傳媒最終等唔到齊昕，卻發現一班「保普聯反佔中大聯盟」嘅核心要員，包括發起周融、吳秋北、陳勇、馮家彬及幫佢哋做公關嘅程介南，喺中午時分去到禮賓府，斷估係同梁振英食飯，唔會係探齊昕病啩？
八方問過周融，呢餐係咪梁振英擺嘅反佔中「慶功宴」？席間又分享咗啲咩意見？周融回應：「大家都係食餐飯，傾吓閒偈，冇乜特別啫。」咁梁振英有冇約定下次幾時再飯敍？周融話冇呀；而呢餐疑似慶功宴，梁太唐青儀冇現身。八方問特首辦點解會有呢餐飯？特首發言人回覆稱，特首不時與各界人士會面交流。