噚日滬綜指大漲超過2%，滬深股有近百股漲停，兩市成交亦輕鬆破萬億關。前日大摩發報告，料上證綜年底目標4000至4800點，即係仲有12%至34%升幅。大行解讀後市，離不開用傳統、正路方法，即係睇估值。
不過，相信近呢一年來，大家都知內地股民炒股，係根本完全唔會理基本因素，你同佢講PE，佢話知你白癡。理得你百倍定二百倍，最緊要係有冇國策概念炒先？有嘅，就唔該全個板塊幫我掃到佢停板。好似當英德法意都話加入亞投行，市場認為有利一帶一路，於是南車（1766）、北車（6199）A股全部升停板。至於內地客熱炒嘅太陽能版塊，昨日亦因為光伏站建設目標超預期而全部起飛。所以觀乎目前經濟放緩，預期阿爺改革提速，亦會陸續就唔同行業推出刺激政策。
A股炒上，最直接受惠係證券股，識得博，一定博南華金融（619）。呢隻冇錯係本地券商股，不過近年內地券商紛紛南下尋寶，好似西南證券購敦沛金融（812）、泛海購時富金融（510）、光證購新鴻基金融。南華金融近年試過三次獲洽賣盤，最後拉倒，而家A股熱鬧，內地券商求殼心切，增加南華金融嘅牙力。同樣炒賣盤嘅華富國際（952）PB都已炒到1.9倍，南華金融市值5.7億元，市值細得罕見，PB一倍多啲咁大把，未免平得過份！
Fifi
http://www.facebook.com/lovefrystock
本欄逢周二、四刊出