費蘭度托利斯（費托）去夏離開車仔轉投AC米蘭，再俾AC借去馬德里體育會，當堂成個人生晒，仲喺前晚場歐聯十六強次回合做埋英雄。馬體會憑中場馬里奧蘇亞雷斯入波，主場贏利華古遜1:0，兩回合合計踢成1:1平手。雙方加時後都冇入波，要互射十二碼分勝負。
傑斯寧宴客成罪人
頭四輪馬體會同利華各有兩個球員射失，去到第五輪費托一腳射入，但傑斯寧卻貼楣而出（下圖）。結果費托呢一腳，協助馬體會以互射十二碼贏3:2入八強；佢賽後話：「我選擇返馬體會係好正確，我從來冇質疑過呢個決定。」之前費托喺車仔效力三年半只係喺英超入得二十球，俾人嘲笑係車仔最失敗嘅收購；講番嗰段日子，佢咁回應：「我嗰陣時好似着住濕衫游水。」車仔喺今屆歐聯十六強出局，唔知領隊摩連奴有冇後悔放走費托呢？而同馬體會喺二○一七年夏天約滿嘅教練施蒙尼，據報會喺短時間內續約㖭。另外，馬體會雖然出線，但就傷咗龍門莫亞、魯爾加西亞同埋文迪蘇傑。
識睇，一定係睇足英台【英波Live】：
http://soccer.appledaily.com
http://bit.ly/engballlive