「毒」自去鳩嗚雖然好瀟灑，不過餐廳入面唔係雙雙對對，就係一家大細，費清一支公，都咪話唔尷尬。最好就搵間可以自己一個對住幅牆食飯，兼唔使搭枱，例如迴轉壽司咁，就算隔籬咁啱坐咗對煙韌小情侶，都可以扮時運高睇唔到吖嘛。
但年中咁多人食壽司，到底邊款最受歡迎呢？元氣壽司噚日就解答咗，原來係三文魚！據講元氣每年銷量一千五百萬件，屈指一算，即係可以圍繞標準田徑場三萬七千五百個圈。估佢唔到呢！元氣壽司業務總監葉育康話，三文魚之所以咁賣得，竟然係因為冇特色，魚味唔會太強烈，就算本身唔鍾意食魚、或者第一次嘗試食壽司嘅客，都唔會太抗拒。其餘「我最喜愛壽司」依次係炸蝦卷、辣味三文魚軍艦、芥辣三文魚軍艦同飛魚子軍艦。
＃三文魚定紅豆軍艦？
費清班同事成日話自己唔正常，一於嚟個不負責任民意調查。結果不出所料，一款都唔中。小黑揀元氣卷，鍾意佢大件夾抵食，又有三文魚又有軟殼蟹，一啖滿足你三個願望咁話；油甘魚、筋子同左口魚裙邊都有票，原因好多元化，總之就係懶特別。
講到特色，又點可以忘記「食完可以做兄弟」嘅明將壽司？淨係一嚿紅豆軍艦已經大殺四方。費清相當好奇，唔知三文魚同紅豆拗手瓜，邊個會贏？
費清 ＃要生計，也要生活 ＃毋忘初衷