標準工時立法爭拗進入戲肉，噚日標時委員會開會仲爆大鑊，話說上次會議尾聲，主席梁智鴻宣佈成立專責小組跟進規管工時問題，仲欽點其中五名委員加入小組，噚日開會就係聽專責小組匯報建議，勞方委員梁籌庭眼利，埋位發現會議紀錄提到委員會委員同意成立專責小組，當場扯火，佢話上次開會委員根本未就專責小組成立表態，質疑小組合法性，「𠵱家即係等於你強姦咗人，仲要人多謝你」。梁智鴻最後一錘定音提出即場投票表決係咪支持成立專責小組，以十三票對兩票通過成立。政府諮詢組織一向透過協商解決分歧，要舉手表決非常罕見，梁籌庭做咗十八年勞顧會委員都未試過。