上星期吳綺莉涉虐女被捕，連日都有好多關於佢私生活嘅報道，噚日仲有指佢二○一二年識咗立法會議員石禮謙後，好主動咁成日send短訊畀人，又三更半夜踩上人哋屋企，嚇到對方嗱嗱聲斬纜。
吳綺莉噚日中午去有線電視大樓開會，馮仁昭收到風係因為佢主持嘅節目會添食，吳綺莉去深井午飯後，下晝三點幾就返數碼電台，直播後見記者。
吳綺莉接受近半百記者訪問，「首先同大家講對唔住，搞到大家咁頻撲。𠵱家想顧番小朋友感受先，佢（卓林）始終係小朋友，希望大家唔好騷擾佢，畀佢過正常生活，努力工作，學習做好媽咪。」
問吳綺莉會唔會戒酒？佢諗一諗後答：「好多方面都要學！（見到卓林未？）未！（係咪仲喺醫院？）應該係！（有冇同卓林溝通？）暫時未有，社工溝通緊！」問佢會唔會再同卓林一齊住，同擔唔擔心失監護權？佢話：「要睇社工決定，呢樣嘢唔係我擔心得嚟，呢刻冇嘢比我同個女溝通更緊要。」
成龍的事不會管
被問到疑似毒品究竟係邊個？吳綺莉話唔喺屋企，唔清楚。問佢有無懷疑卓林吸毒，佢話交晒畀律師處理。內地傳媒問佢，卓林父親（即成龍）有冇關心呢件事？吳綺莉用普通話答：「不清楚，人家的事不會管，最重要是小孩子平安。」
撰文：馮仁昭
