升中時媽媽便教我們兩兄弟自己熨衫，因她每周已要應付爸爸的五件裇衫和五條西褲，那有餘暇招呼我們的校服？到我們子女這代，可能子女的媽媽本身也不懂熨衫了！因萬事都有菲傭代勞，而且「叫阿仔熨衫？唔驚辣親佢呀！」結果，環境越富庶，資源越充足，新一代所懂的技能反而越來越少。你可能會話：「熨衫，好小事啫！」係嘅！但祖母的炆冬菇、鹽水雞等好菜式，到我這代很可能要失傳，我就覺得好大件事！
除了技能，新一代還可能喪失很多體驗，例如「街場跟隊」。首先在場邊要經得起日曬雨淋，而且那種赤祼祼的汰弱留強，殘忍得來又好鬼貼近社會現實。我永不會忘記那次在柴灣公園，七隊跟一個場，成隊等了一個鐘先有得踢；點知守龍的我第一次觸球，就不慎將皮球拍入自己龍門！又要再等！雖然隊友無奈多過指摘，但以後落場誰還敢大意？個個定必打醒精神，小心翼翼！現在不用再跟街場的小孩，可能已經唔曬得、唔熱得，寧願留在冷氣房打機。大意輸波？熄機load save咪得！
我並非扮晒老鬼指摘一蟹不如一蟹，我的意思是：雖然大家冇可能炒晒啲菲傭，街場亦未必再可跟隊；卻可身體力行，主動與孩子一起做家務；鼓勵他們多出汗，尤其競賽性運動。由父母做起，孩子的「技能和經驗」就冇咁易消失。
方栢翹
now足球評述員