農曆年過後，市面好似迅速回復寂靜狀態，餐飲零售都唔暢旺。有話自由行遊行少咗，有講激進派打水貨打埋人，趕走自由行遊客。旅遊界名人Y更指屯門暴力示威鏡頭不止本港電視台播完又播，外國電視亦好快將畫面傳遍世界，嚇親一啲甚少來港旅遊之外國人，特別係講普通話之海外華人，已經知道有旅行團取消來港，人地唔知道屯門離開中環好遠嘅啫。
但市面靜，好難完全歸咎於打水貨示威。餐飲M通知，年初六過後，陸續收到高檔中檔食肆停業消息，由上環至中環至銅鑼灣都有，佢忙於查數，睇吓有冇食肆執笠走數，連累埋佢。佢數數吓，一共六間西餐廳結業，但呢行又興改頭換面，易名經營嘅，餐飲M話不知詳情，內情就唔知開邊瓣。
不少人以為投資餐廳係時興潮流，殊不知因為三高──人工、租金、食材三者費用高，晚餐生意少啲，都難以維持落去。餐廳R知道餐飲M嘅傳聞之後，來短訊告知，中環一間法式餐廳並非改名咁簡單，佢已經見到一封清盤官（liquidator）嘅債權人開會通知信。
如此說來，餐飲業可能掀起一片結業潮，基本上與自由行遊客無關，而係本地人消費力下降或消費模式改變之故。肥仔K及一班朋友，睇見日圓下滑不止，全部想去日本旅行食魚生、拉麵。譬如到威靈頓街豚王排隊入內食拉麵，最低消費起碼80至120元一個人，因匯率關係，東京名店賣800日圓嘅拉麵只等於港紙50。富豪C啱啱去完東京回來，話食美國牛肉放題食到不亦樂乎，只需1900日圓（每位計），食和牛放題就要3000日圓，梗係抵到爛啦，故此肥仔K等人話：「在港慳番幾個月唔去食貴嘢，足夠去日本食更靚嘅，食到飽一飽！」
同樣道理，去曼谷、首爾都係一樣啫，泰韓兩國上星期突然減息，泰銖韓圜兌港元應聲下跌，益晒去曼谷首爾血拼之香港旅行人士。相反嚟講，美元全世界獨大，港紙冇條件都要死跟，港元兌所有外幣都上升，咁東南亞遊客，日韓遊客，歐洲遊客，就會失去來港旅遊嘅興趣，內地人亦識得咁樣諗，湧去日本韓國泰國嘅啫，香港匯水高先至係今年旅遊零售淡靜嘅最大理由，暴力示威打水貨只係雪上加霜而已！