炒完普耶唔夠廿四個鐘，新特蘭周二即宣佈由六十七歲嘅艾禾卡特接替，將會教到季尾。相信唔使我求大俠點提呢位荷蘭教頭個名，大家都應該聽過，佢除咗教過荷蘭、南韓同比利時幾支國家隊外，亦曾經踏足過英倫三島，喺蘇超幫格拉斯哥流浪捧過兩屆聯賽冠軍，所以對英國波應該好熟悉，新特蘭主席索特亦都對佢有好大期望，話有呢位經驗豐富嘅主帥帶領，黑貓實可以逃過降班厄運。
據英國《每日星報》報道，佢嘅周薪只係二萬五千鎊，但如果成功幫黑貓護到級，就額外有五十萬鎊（約五百七十萬港元）進賬。新特蘭𠵱家排尾四，同尾三嘅般尼只係爭一分，形勢惡劣，我求大俠喺度祝佢同黑貓都好運，但首先要將陣中嘅瘀血，好似布朗等收埋先，有呢位計時炸彈係後面，真係前面入完都唔夠輸。
識睇，一定係睇足英台【英波Live】：
http://soccer.appledaily.com
http://bit.ly/engballlive