香港賽馬百幾年歷史，過去最出名嘅馬評家，毫無疑問係董驃，佢直情係大明星啦！而香港首位女馬評家，好多人都知道係綽號O仔嘅張美德，之後陸陸續續有唔少女馬評家出現，部份更交咗個騎師男朋友，好似楊明綸女友莎拉，以及梁家俊另一伴阿Kit，都係現時賽馬節目主持生力軍。其中阿Kit近日喺打吡貼「醒目名駒」，結果跑第三位置派274.5元，可謂響晒朵。
咁首位躋身馬主行列嘅女馬評家，又係邊位呢？原來就係今期（18日）第七場三班一哩「心好事成」歡樂群英團體成員施佩蓮。好多人都識呢個團體嘅何世柱，佢曾係政界名人兼《天天日報》老闆，但施佩蓮個名好陌生喎！馬迷的確可能唔識施佩蓮，但就一定識珊翠絲，施佩蓮其實就係珊姐嘅真名。
珊翠絲百足咁多爪，除咗講馬及做保險，又喺有線做唔同類型節目，佢就好有料喇，咁佢隻馬「心好事成」掂唔掂呢？睇番近三場攞到兩季一殿表現唔錯，其中上場直路受困下，只輸畀頭馬「文藝復興」個半身位，擺明同珊姐一樣咁有質素。
今次「心好事成」初跑谷草，對手大大減弱唔在講，仲要初配雷神，睇嚟珊姐分分鐘再創歷史，成為首位贏馬嘅女馬評家！