正當香港珠寶商生意跌到嗌晒救命時，在內地擁有逾二千六百間分店的金舖老鳳祥，心口竟然掛住個勇字，今時今日才來貴搶尖沙嘴及旺角兩個巨舖，進軍香港市場。
有業內人士就食住花生咁話，喺香港賣珠寶，八成銷售都是來自內地遊客，你話內地人專程來香港購物，會唔會唔買香港品牌？反而幫襯在大陸日日都見到的牌子呢？
而且老鳳祥雖然在上海老家及江蘇一帶頗有競爭力，但一落到廣東省，其實已經唔掂。所以朋友說，老鳳祥來香港，其實只是做吓branding，根本唔構成威脅，況且開金舖，蝕極都有個譜，相信老鳳祥計過條數，亦唔志在。
其實，珠寶商決定開唔開一間舖，條數應該是怎樣計算？金舖的純利率一向唔算太高，一般賺8至10%已經很不錯。但由於他們賣的產品價格夠貴，所以即使賺幅唔大，仍足夠他們應付皮費綽綽有餘。
香港三間主要珠寶商，他們租金及人工成本，只各自分佔其銷售比重約5%，較其他零售商和食肆，動輒達一、兩成輕鬆好多。
以某龍頭為例，他們的business model，是有本事做到開舖第一個月，就即刻賺錢，所以多年來才一直「開到盡」。分析員朋友計過，即使珠寶商現時每個月生意大跌兩成，跌足一年，都仍未跌到要蝕錢。只是盈利大倒退、關舖及裁員，可能就在所難免。
海迪