歐美在六十年代已經鼓吹「企業社會責任」（CSR），但在香港真正大行其道，只是近十多年的事，不過已迅速成為企業公關的必修課。也不是全無爭議，支持的會話大企業有CSR視野，會反映在盈利上；反對的就認為CSR 有違營商經濟原則。
不過，商界最靈活，西瓜必定靠大邊。現在萬眾一心，學者支持、fund佬又buy、傳媒又表揚，他們哪會唱反調。
好多外國fund，決定入唔入你隻股票，也會參考你公司在CSR和環保的表現，Mary早年就試過在外國CSR分析專員探訪公司前，用一日時間幫投資者關係組惡補，又寫PowerPoint、又做FAQ，最後還是得sit in以防萬一。今天，大企業的投資者關係經理，sell起呢一瓣，甚麼GRI、甚麼supply chain management，早已琅琅上口，甚是吹得。不過，Mary相信物極必反，潮流去到最盡，必然反彈，等吓啦，總有回歸盈利至上的一天。
早期講CSR，梗係先講慈善捐款、義工隊、環保之類，發展下來，大家又似乎好鍾意Stakeholder engagement（持份者參與），咪睇好似好深奧，用「人」話講咪即係擺平利益相關單位，如此一說，聰明的你當然已經明白，商界特別buy，不無原因，先搞定「麻煩友」，包括監管機構、地區人士、環保分子、有機會被項目影響的人士、傳媒、意見領袖、未來客仔……先以誠意封咗人家把口，令項目得以順利推行，engage就engage吧。
彭瑪莉
mailto:[email protected]