年底就係新一屆區議會選舉，原來新民黨主席葉劉淑儀同區選都好有淵源，近日喺fb圖文並茂話當年。佢喺八二年出任首席助理政務司（地方行政），主要就係推行首屆區議會選舉。佢話當時同團隊推動區選時，社會上唔係好多人有興趣；就算去到廣播道、即係當時俗稱嘅「五台山」向傳媒簡介，反應都好鬼冷淡。
雖然做開荒牛係好辛苦，但佢話過程至今難忘。佢仲好記得選舉當日，佢同成班同事要通宵當更、視察各區情況，最後估唔到，反應又唔錯喎，投票率算係幾好，其中新界地區嘅投票人數仲有近四十萬，完全意想不到。原來此佳績亦帶挈葉劉獲時任上司鍾逸傑發信表揚，甚至連時任港督麥理浩爵士，都對佢呢位Small Potato發信畀like，葉劉話自此一役佢就受到賞識，八三年調任保安科，開展保安科相關工作生涯。