諾貝爾經濟學獎得主克魯明（Paul Krugman）出名講嘢不留情面。佢早前批評瑞典央行喺歐債危機高峯期，息率不減反加，引發通縮風險；瑞典央行副行長揚松（Per Jansson）最近就反駁克魯明，狂批佢根本唔清楚瑞典情況，叫佢返去讀多啲書，咪再亂寫嘢。
揚松指，瑞典央行當年嘅行動係有根有據，當時瑞典經濟增長較歐洲快，令信貸與樓價上升，所以要加息。瑞典近年嘅經濟增長跑贏歐元區成條街，仲好過英國，甚至接近美國，力撐當年決定正確。
克魯明唔係省油的燈，當然要駁嘴，指瑞典增長的確好快，但失業率仍然係海嘯前水平，通脹亦低於2%，堅持瑞典冇理由加息。有趣嘅係，二○○八年底金融海嘯發生後，正正就係瑞典央行決定頒諾貝爾經濟學獎畀克魯明！