阿爺喺份《工作報告》中，八度提及「互聯網」呢三隻字，更提出「互聯網+」戰略，證明呢個板塊會繼續受惠國策。其中最大亮點係互聯網金融，事關阿爺主動邀請融360及螞蟻金服去上市，就知呢個板塊係重中之重。
中軟國際（354）夥拍騰訊（700）染指呢個行業，噚日一彈就彈14%；怕高處不勝寒的話，睇埋隻金蝶（268）。金蝶近來公佈，同螞蟻金服於互聯網金融領域合作。金蝶坐擁大量中小企客，更有招行（3968）、平安銀行、阿里等金融巨頭partner。股價噚日大陽燭炒高，以八月高位收市，可望睇高一線。
另一隻要mark實嘅金融股，就係金威資源（109）。呢隻股最大亮點，點可以唔提一月新鮮入主，外號「炒底王」嘅鄭建明？佢二○一二年入主順風清潔能源（1165），之後隻股大炒特炒。去年更憑動用個人資金三十億人仔，收購無錫尚德一戰成名。仲有隻玖源化工（827），佢入主後股價最多炒高近四倍。
鄭建明一月底時以二十五億元，每股0.439元認購金威新股連CB，隻股復牌高開後，一直只係橫行未炒過，噚日就大陽燭破位。通告話佢會將資金用作擴大投資及金融業務的範圍，仲牽涉互聯網金融！不過呢啲嘢都係搵來講，呢隻金威點睇都係財技股，而家股價破橫行格局有異動，有閒錢可買入博已經撳咗掣。
Fifi
http://www.facebook.com/lovefrystock
本欄逢周二、四刊出