今時今日乜都講智能，李寧（2331）最近唔執輸，計劃聯同小米旗下公司「華米」推出智能跑鞋，呢對波鞋有幾智能？官方圖片就將跑鞋、小米手環、小米手機放埋一齊（圖），話可以收集跑手運動數據，對跑姿同埋步態進行分析，幫跑手提供專業指導，暫時計劃今年第三季推出。
聽聞，李寧今次會參考小米嘅營銷手法，將波鞋以低價定價，首階段會先推出兩款波鞋，一款叫原有品牌「烈駿」，另一款就未講名字，只強調「定價極為親民」。波鞋亦會跟小米嘅Apps連接，進行運動紀錄、步態分析、專業指導及里程換購。
查實除咗李寧之外，361度（1361）舊年九月，已經搵嚟百度旗下公司「百度時代」搞兒童智能鞋，仲成立「運動數據創新實驗室」研究同管理數據，唔知騰訊（700）與阿里巴巴又會否跟住參與呢個智能鞋市場呢？