外圍吹美國加息風，美股下跌，點知內地A股噚日就爆升破頂，雖然港股近期係冇A股咁強，但整體大市都比前硬淨，後市應該安全。
H指亦連升三日，跑贏恒指，原因係恒指俾息口敏感股拖後腿，但對於恒指嚟講，反彈只係起步初期，9日RSI連四十都唔到，稍後大把反彈空間。中資股轉強，兼且滙控（005）同賭股已經嚴重超賣，就嚟止跌反彈，兩項因素足以支撐住未來兩周大市，呢啲環境就算持倉重啲都唔係乜嘢問題。
藍籌股變咗中資股天下，A股破頂自然令之前無厘頭急插嘅中資保險股反彈，但晉佳更加喜歡內銀股。
以前內銀股係價值陷阱，原因係影子銀行規模又大，理財產品風險又高，你永遠唔知道佢哋表外嘅嘢有幾恐怖，壞賬有幾嚴重。
不過，未來一段時間，內銀股風險問題只會一路better off，點解？因為搞利率市場化等等嘅金融改革之前，中央一定要摸晒內銀嘅底，然後執靚內銀嗰盤真實嘅數，以確保內銀肯定可以頂得住改革而產生嘅改變，令金融體系保持穩健。否則利率市場化影響行業競爭環境生態，隨時搞死埋內銀就大劑。
事實上，中央摸底過程一早做完，自從舊年十一月減息開始到而家，人行頻頻放水，新增貸款爆升，地方債置換又減低經營風險，優先股發行又令內銀多一條集資渠道，樣樣都令內銀股資本更充裕，風險更低，所以目前正處於中央執靚內銀股盤數嘅階段。
招行執行能力高
改革之前，淨係執靚內銀股盤數絕對未夠，其實仲要提升市場對於內銀股以至內地金融體系嘅信心，令到利率市場化殺到埋身之時，投資者、企業家、以至存款人、貸款人都信得過內地金融穩定性，所以，起勢維穩，勝過一切。
大型銀行股目前市賬率只係一倍左右，如果中央要明顯提升內銀股安全性，一定要支持內銀股嘅市賬率明顯高過一倍水平，高過發新股集資門檻，點解？因為市賬率遠遠高過一倍，內銀股有乜事都能夠攤大手板集資，甚至供股，大戶散戶一齊仆到入嚟科水。講到呢度，大家就知道未來一年半載，內銀股應該有排炒。
要保障內銀股風險唔高，然後搞利率改革，最受惠點都係原本經營風險比較高嘅中小型內銀，其中，招行（3968）同民行（1988）執行能力都高，呢個moment晉佳揀招行，短線二十蚊難度唔大，中線首站目標價以市賬率1.5倍計價，先睇二十二蚊。
至於之前出過盈警嘅天虹紡織（2678），噚日啱啱公佈舊年業績，事前係人都估到佢業績差，所以係non event，至於出完業績股價只係低成交之下調整1%，如果今日保持如此硬淨，睇怕後市跌唔落，短期內等開多次turbo。
晉佳
http://www.facebook.com/pages/晉佳/719009541518415
本欄逢周二刊出