有關成龍嘅消息真係沒完沒了，新近有一單跟毒品冇關，只係同錢有關。成龍阿仔房祖名跟媽媽林鳳嬌喺九龍塘有間豪宅，喺正約道二號與窩打老道一百四十五號交界，兩地盤分別喺上月向地政總署申請補地價，其中約道二號嘅補價逾四千四百萬，窩打老道一百四十五號就補超過二千五百萬，兩個地盤合共補地價七千萬元。
九龍塘一向係富豪名人聚居地，約道亦因前高官唐英年大宅喺正呢條街而聲名大噪。
聽講，房祖名與媽媽持有呢兩個地盤，早前已經向屋宇署申請建築圖則，合併一齊發展兼且有個地庫，總樓面一萬二千六百幾平方呎。若果以最新補地價計，每方呎地價五千五百四十一蚊，又唔算太貴。
今次佢哋應該好大機會係搞個地庫，至於係起地庫皇宮，還是純粹泊車，就要問房祖名喇。佢呢兩個地盤相當值錢，聽聞淨係約道二號都估值兩億幾，舊年底中聯辦就將約道六號以近兩億四千萬賣走。