四十二歲單親媽咪吳綺莉日前涉嫌虐打女兒吳卓林（小龍女）被捕，噚日繼續有大批傳媒喺佢屋企外面守候。直至噚日下晝一點半左右有一名女子現身，佢帶住一大袋物品到達，逗留到下晝三點離開。對於記者提問一概冇回答。
返電台開工
下午四點左右，吳綺莉駕車離開寓所，到灣仔的DBC數碼電台開工錄音，但去到公司樓下俾職員攔住佢出示職員證，不過由於佢嘅座駕被記者包圍，所以冇絞低車窗，對於記者提問，佢只係揮手示意唔接受訪問。
噚晚有線繼續播出吳綺莉接受張學潤嘅訪問，吳綺莉覺得今次事件發生，係因為近幾年冇好周到咁照顧小龍女，又希望：「以後大家照顧大家情緒，會飲少啲酒。」
另外，吳綺莉好友堪輿學家麥玲玲前晚出席喺旺角舉行嘅盆菜宴，力挺好友話經常都有同對方傾電話，兩母女感情好好，可能小龍女正喺反叛期同埋擔心媽咪先引起事件。佢話因為吳綺莉係教徒，所以唔會教佢擺風水陣。
撰文：馮仁昭
