俾皇馬球迷噓咗咁多場，加里夫巴利終於要爆嘞！佢喺周日西甲梅開二度，幫皇馬主場贏利雲特2:0。入波後，巴利掩住耳仔慶祝，明寸噓咗佢咁耐嘅球迷。至於曼聯嘅朗尼亦用慶祝動作回應外界嘅流言，喺主場贏熱刺3:0場波入面扮打拳自嘲。
巴利入兩粒 C朗黑面
之前成個半月冇入波，巴利都飽受壓力，尤其係皇馬啲球迷成日狂噓佢。星期日場西甲，巴利終於用入波去塞住球迷把口！十八分鐘，基斯坦奴朗拿度（C朗）倒掛射門，俾對手護空門，撞番個波出嚟，巴利即刻一腳抽入，幫皇馬開紀錄。巴利掩住自己對耳慶祝，好似同球迷講「咩都聽唔到」，回應噓聲；之後佢跑去一腳踢低角球旗，將呢排嘅鬱悶發洩出嚟！
巴利條氣順晒，但C朗就唔太高興，球倒掛咁靚都入唔到，仲益咗巴利執雞，佢嗰刻表情好不滿。之後C朗喺四十分鐘嘅射門仲省中巴利對鞋，輕微改變方向入網。時來運到，梅開二度嘅巴利當然高興，但入波變助攻嘅C朗又唔高興。最終比賽以2:0完場，賽後皇馬球員都去到中圈多謝球迷，但唯獨C朗冇去，自己返入更衣室。前幾日有傳前曼聯領隊費格遜同C朗見面，游說佢返曼聯。C朗喺皇馬咁唔開心，唔知會唔會返去？定係C朗又想藉唔開心同埋費Sir過橋扭計加人工呢？
朗尼自嘲反駁傳媒
不過，曼聯𠵱家大把球員識入波，都唔一定需要C朗返嚟。曼聯周日靠費蘭尼、卡域克同朗尼各入一球，主場大炒熱刺3:0。朗尼喺上半場把握對手失誤，大步帶波入禁區都冇人理，幫紅魔射入埋齋一球。佢之後扮打拳慶祝，再扮被人打暈，好似冇晒知覺咁撻落地。我求大俠都有追開朗尼啲新聞，睇見就即刻會心微笑。因為英國《太陽報》早兩日公開咗條朗尼喺屋企同前隊友巴士利打拳嘅片，朗尼俾巴士利一拳打到瞓低；而朗尼呢個慶祝就擺明自嘲，兼回應傳媒。
朗尼賽後對傳媒披露佢嘅私隱表示不滿，「呢個就係我哋嘅社會，幾個朋友喺私人地方嘅活動竟然做咗報紙頭條，但成件事只係我同朋友間嘅玩笑。我一直都專注比賽，我認為比賽比起我嘅私事更應該值得大家關注。」領隊雲高爾亦似乎同朗尼夾定口供，「我哋究竟生活喺一個咩嘅世界？我唔能夠想像會喺賽後傾一件咁嘅事，簡直係個扭曲嘅世界！」至於網民就惡搞朗尼嘅慶祝，將佢同米高積遜key埋一齊。
識睇，一定係睇足英台【英波Live】：
http://soccer.appledaily.com
http://bit.ly/engballlive