話說央視每年會喺「三一五」消費者權益日，搞直播晚會踢爆一批黑心企業，年年都有上市公司中招，股價大跌。今年晚會的導演曾接受訪問，透露今年會關注互聯網、日用消費品類，即係話，網購今年會成嚴打對象。不過，總理李克強在該日上午人大記者會表示撐網購後，劇情就峯迴路轉！
李克強當時話，「我很願意為網購做廣告」。央視如果仲唔識做，令總理冇面，簡直係自己找死。於是乎，當晚央視節目安排出現極為罕見一幕：本來夜晚八點開始的直播，要延遲四十四分鐘先開始。節目開名踢爆多家公司侵犯消費者呃錢，範圍覆蓋汽車、保健品、銀行、電訊，但就冇一間互聯網企業。央視聲明話係節目正常調動，明眼人都知發生乜事。一個全國矚目直播節目，如果唔係有重大原因，點可能離奇延遲咁耐？更何況，網購係內地消費者最多投訴範疇，央視連一單都冇提，實有古怪。
李克強一句話，令所有網購股有咗金剛罩，噚日A股網股包括小商品城、生意寶等，差不多全部升停。有江湖傳聞話，央視今期已經搵晒料報道阿里巴巴賣假貨，本來想在「三一五」晚會一鋪砌低佢，而家阿里巴巴好可能逃過一劫。
李可強