每次去台灣旅行，喺機場返香港時，都會喺鏡嘅倒影，見到有條友拖住個大篋、拎住大包細包，腦海都會浮起「水貨客」三個字。不過，費清可能會收斂啲，因為香港7-Eleven（圖）會加強「博客來訂購、7-Eleven門市取貨」服務。
＃直接郵寄郵費貴
7-Eleven舊年四月推呢項服務，喺博客來網站（www.books.com.tw）訂書，可以選擇喺香港7-Eleven指定門市攞貨，以前只限書籍咋，但𠵱家會大幅擴展到三十幾項共四萬種商品，包括台灣設計嘅文具用品、男女服裝飾物、彩妝用品、美食乾貨、電子周邊產品等。
而且，為慶祝一周年，香港會員喺博客來網站購物，即日起至三月三十一日前，買五件以上貨品可免運費直送到港。
堆填區才子阿貴話，之前想喺個網訂CD，但當時因為唔係書，唔可以喺7-Eleven取貨，「直接寄去屋企郵費好鬼貴，所以唔訂。好多CD香港都冇，連謝金燕都冇！」阿貴，你𠵱家可以訂謝金燕喇（雖然佢否認想訂謝小姐嘅CD）。
網站會喺有關商品嘅「運送方式」，註明「7-11取貨可取貨點：台灣、台灣離島、香港、澳門」，但費清發現網頁唔可以只揀選可在香港取貨嘅商品，所以當你睇啱貨品，可能會發現唔可以喺香港取貨，咁就激死。
費清 ＃要生計，也要生活 ＃毋忘初衷