魔迷等足七個月，禮拜日，曼聯終踢出開季以來最漂亮嘅一場波，大炒熱刺。朗尼入波後，扮拳手被K.O.後撻喺奧脫福草地，盡顯英國人嘅幽默，也幽眾星級前鋒隊友一默，也幽戰術大師一默，當然最後真正被K.O.嘅係熱刺嘅歐聯夢。
長途如聯賽，永遠係畀自己、畀對手從錯誤中學習；熱刺前周喺聯賽獨腳戲，又係靠哈利卡尼險勝弱旅昆士柏，上文提過，球迷似忘記當時昆軍負責「嘜」佢嘅係極速老退嘅里奧費迪南。但哈利卡尼，其實喺再對上一場，已經喺聯賽盃決賽，畀車仔一對英軍中堅搞到冇符，當時全場三射一中框，食白果。
嚟到禮拜日晚嘅奧脫福，呢位本周勢首入國家隊嘅超新星，又畀另一年輕力壯嘅土炮中堅基斯史摩寧盯死，去到八十九分鐘先錄得第一次正式攻門；佢效力嘅熱刺慘被K.O.跌落第七，賽程剩下硬嘢包括下月作客修咸頓同主場鬥曼城，唔算太難打，但失地太多，來季想繼二○一○年後再圓歐聯夢，殊不容易。
除非係天王級美斯同基斯坦奴朗拿度，否則筆者唔信乜嘢超新星，最信係操生殺大權嘅領隊；不過看過曼聯大炒熱刺，個人看法有啲動搖。戰術大師雲高爾嚟咗奧脫福七個月，排陣星期美點，啱啱賽前先畀轉行做講波佬嘅亨利，笑佢根本教唔掂。言猶在耳，曼聯嘅新陣，即打出今季代表作，防線滴水不漏，進攻悅目流暢；不過功勞大部份不在雲高爾，而係半被迫用朗尼作單一進攻重心，打正箭頭，發揮呢架坦克車最強威力。
球會用天價買迪馬利亞，又天價借法卡奧，仲有雲老嘅荷蘭同胞尹佩斯喺度，前線爭崩頭，又唔想畀人話嘥錢，夾硬迫朗尼移後打攻中，不厭其煩講：嘥料！曼聯大炒熱刺，有一啲數據值得備忘。除咗今季揭幕戰負史雲斯1:2外，朗尼之後喺聯賽八戰有波入，曼聯全勝；而今場亦係除咗揭幕戰外，前提嗰三位前鋒大哥未加盟或不列上陣名單後，正選陣容上首次由朗尼喺前線單拖孭重飛，結果呢架人型坦克車再添入球，以十一球躍升球會今季聯賽頭號射手。
撐槍手破摩納哥
迪馬利亞六千萬鎊加盟曼聯，越踢越沉，近期經常由翼位引球入中路拖死球會進攻，朗尼配合無從；適逢停賽缺陣，魔迷可以見到，其實曼聯呢場打嘅4-1-4-1，威力暫時最強，兩翼路爾斯華倫西亞同艾舒利楊格，完全牽制熱刺一向最強嘅兩翼側擊，截斷哈利卡尼供應，搞到熱刺普帥開波半粒鐘已要換人變陣。見到喺看台睇波、以往擅長兩翼快攻呢套嘅費爵爺，笑晒！
雲帥拔刺，爭歐聯位如注強心針；唔知雲格今晚歐聯作客摩納哥運氣如何？未落場，先唔好想輸實或者有奇蹟，隊波好銳，踢得好有助重返聯賽爭三甲，不博「讓球」，直取單W甚至4.1倍[-1]「客勝」吧！
文：波神