特首梁振英委任行會成員廖長城出任校董會主席，惹起科大生不滿，為咗「夾道歡迎」呢位被視為「紅底梁粉」主席，有科大學生喺科大校園掛上兩條黑色橫額，寫上「熱烈歡迎廖長城同志就任校董會主席」同埋「紅出沒注意 睇—住呀」（圖）。八方噚日向行會秘書處詢問，廖長城點睇科大生嘅「歡迎」形式？但截稿前未回覆。
呢條橫額係用簡體字寫㗎，仲叫廖長城做「同志」，行文用字似足內地省市歡迎共產黨高官造訪咁款。點解同學仔稱呼廖長城做「同志」？八方唔知呀，只記得梁振英未正式上任特首前，內地人民網曾經以「同志」稱呼佢，惹嚟佢係共產黨員嘅猜測。