去年雨傘運動燃燒港人對爭取真普選的一團火，藝人黃耀明和何韻詩站出來為民發聲，無懼得罪內地政府，有指兩人被內地列為黑名單，憂心事件會影響他們在演藝事業的發展。隨着雨傘運動的落幕，據知，明哥於去年除夕跟寰亞約滿，公司無聲無色跟他分手，於今年中約滿的阿詩，將同樣不獲寰亞續約，惟明哥和阿詩沒被打沉，兩人越挫越強覓出路。
寰亞的揸弗人是旅發局主席林建岳，不獲續約跟政治因素有冇關係？明哥昨在電話中說：「雨傘運動期間製造尷尬同麻煩，佢冇同我傾續約，我都會明白，坦白講，雨傘運動開始到𠵱家半年，我喺大陸同香港都零工作，大家太謹慎，如果變得連繫都驚，香港係令人幾憂慮嘅城市，其實舊公司冇講過要我唔好講嘢，我多謝佢尊重我私人選擇，不過奇怪咁多個月冇人搵我做嘢。」
問會否擔心日後生活？明哥樂觀說：「最近台灣搵我做嘢，焉知非福，冇人請我咪搞啲嘢自己做，天無絕人之路！我只為呢個社會擔心，越嚟越壓制反對聲音，有乜異見整個社會、企業、政府，都用有形冇形方法壓制你，令更少人發聲，不過我冇後悔，預咗有呢啲發生。」
阿詩自覓出路
而寰亞高層郭啟華接受電話訪問，問不跟明哥續約是否跟雨傘運動有關？他坦言：「唔可以話同雨傘運動完全冇關，但都有其他因素，大家好成熟，覺得係時候分道揚鑣。」
據知阿詩繼明哥後，將於今年中跟寰亞約滿，她同樣不獲公司續約，記者昨向阿詩求證，她透過助手表示唔回應。其實阿詩於下月在台北和台中舉行「HOCC誰怕誰．演唱會」，都是由她自己主辦，寰亞沒有參與，求人不如求己。
採訪：皓騫