被稱為「西環契仔」嘅九龍東立法會議員謝偉俊，噚日出席電台節目講開青年問題時話喎，知道部份年輕人有興趣了解國家，所以提議政府設立機制俾青年自願性質參軍，非常有創意咁舉例話，不妨考慮當兵三年就可以免費入住軍營住宅十年，趁機解決埋住屋需求問題。
八方噚日追問佢搞邊科？佢話都係好初步嘅諗法啫，因為唔少軍事用地其實喺市區地段，與其荒廢不如轉型，一來可以培訓年輕人有一技之長兼培養佢哋愛國，二來有舒緩上車難嘅問題，一舉幾得。但佢強調呢個只係個人創意想法，未問過中方人士，唔知西環呢一鋪，撐唔撐愛將咁新穎嘅構想呢？