佔領運動期間因為清理路障名噪一時嘅「綠色和諧」阿Man，日前以「忠義民團」成員身份向「熱血公民」成員黃洋達（皇上）下戰書要求「隻揪」。皇上噚日喺網台節目表明會接受挑機，仲建議打「MMA」（Mixed Martial Arts，綜合格鬥技），但講到明要訂場兼「賣飛」，「打（MMA）都希望順手賺吓錢」，甚至話「睇佢嗰邊可唔可以有多幾個人，搞到幾場，可以做到個event（活動）」，好有生意頭腦。但佢強調四月有賽事，最快或要六月先成事。
MMA嘅拳手可以運用泰拳、柔術、拳擊等多種門派招數；除咗牙咬扯頭髮插喉嚨踢下陰犯規，比賽近乎冇規則，聽落都覺呢場決戰有睇頭。阿Man則喺「忠義民團」facebook回應：「一定直接送上挑戰書去你熱血公民處（辦事處）！」