上個禮拜六，除咗係白色情人節，仲係勇士控衞史堤芬居里（Stephen Curry）嘅廿七歲大壽。呢位常規賽MVP熱門生日都要比賽，但只係主場對住聯盟包尾嘅紐約人，結果就收到125:94嘅勝仗做賀禮。
雖然生日冇假放，但居里收到仿製明星周末三分大賽冠軍獎盃嘅蛋糕（上圖）同識發光嘅波鞋做禮物，仲有全場fans唱歌慶祝，生日返工都應該返得幾開心。對住紐約人咁「伊絲執」，壽星仔今場執吓執吓，最終執咗廿五分同十一個助攻，仲以好多精采金球回禮畀大家㖭。佢今場只打三節已經有大把精華，其中印象比較深刻嘅，可能係完半場前球廿八呎嘅壓哨三分，又或者係第三節過咗四個對手之後上籃得分。但最令人想瘋狂尖叫嗰球，肯定係佢未開波前企喺場邊通道射入嗰球超級遠程砲。
勇士平今季三分紀錄
射入全場最高廿七分嘅K湯遜（Klay Thompson）就同居里一樣入夠六球三分波，用自己最拿手嘅「三分雨」幫好兄弟慶生；勇士全隊加埋入咗十九球三分，平埋球隊今季嘅紀錄。
教練卡爾（Steve Kerr）上場作客金塊收起四個正選，俾山長水遠去捧場嘅fans鬧爆，佢之後就化身「K先生」，用E-mail回覆咗幾個憤怒球迷，都算幾有心。