第七場1400米女皇銀禧紀念盃大熱門贏馬，摩廐黑衣巨人「步步友」賽前升呢為全球第二高分馬，今場由贏開之千六縮程至千四米，依然霸氣十足，拉士一度冇位出，最後走之字路，向外繞過「美麗之星」後庄上，照樣撳韁「行」過晒對手，1.3倍大熱win順利開出，連同「新界福星」、「紅白」及「人強馬勁」，雷神截至第七場，今日贏到第四win。
至於「步步友」級際賽四連勝，兼捧走升格國際一級賽後之女皇銀禧紀念盃，在港累積14戰9勝4位，總獎金突破4,200萬大關，今屆馬王由佢同廐侶「威爾頓」單打獨鬥，幕後決定唔遠征杜拜，亦證明選擇冇錯。
大摩近六win全部由雷神經手，其中四場都係來自分級賽，隻隻都係公眾大熱，大摩連續第二年於打吡日贏大賽，預祝自己本月17號65歲牛一，上年佢就係靠另一鎮倉寶「威爾頓」勇奪打吡，威過威士忌！
有人快樂有人愁，東廐「美麗之星」本身都有一級馬水準，可惜生不逢時，繼季初畀「和順超影」行過做二奶後，上場董事盃及呢場一連兩次畀「步步友」話過就過，生成二奶命，季內依然僅得一win。「大運財」贏完1200米重新增程跑1400米，步速唔同咗，蘇銘倫焗住留後跑，臨門追唔切只得第三，衛冕女皇銀禧紀念盃失敗，而「誰可拼」跑第四算有交代。最慘是灰色神獸「和順超影」，莫雅趕唔切抵港上陣，易配布文跑包尾，越跑越退步。