香港地產代理受政府辣招影響，生意有辣有唔辣，並非一面倒好景，但做海外地產代理嘅跨國公司，十年來就一片好景，好到自己都唔信。呢日見到一間跨國大行嘅高層，恭祝佢羊年生意喜洋洋，佢直情係咁笑。對左丁山講：「我唔識講大話，呢幾年生意真係多到做唔切，想話謙虛啲都唔得，未來三幾年，我公司仍然好樂觀。左兄，真係好多人到海外買樓㗎，香港樓價愈貴，辣招愈多，愈係多香港人到倫敦、澳洲買屋，總之係英美澳加，再加曼谷、東京啦，靚樓唔憂賣，你要到倫敦紐約東京曼谷雪梨墨爾本買新樓，即管搵我。」
香港樓價高，辣招增加交易成本，相形之下，買外地樓（倫敦曼赫頓除外）確係幾抵買。根據CBRE（世邦魏理仕）嘅調查報告，2014年亞洲人在境外嘅房地產投資（包括牧場、礦場），總數高達400億美元，比2013年增長23%，投資者（個人加機構）主要來自中國、新加坡、香港、馬來西亞、台灣。機構投資者又以保險公司、房地產投資公司為主。總括言之，上述五大地區（華人聚居地）累積相當財富，不停向境外買入房地產。
最近市場傳聞有一名跨國地產代理公司嘅經紀中咗「佣金六合彩」，某日收到一位投資者電話，想買外地新樓，於是代理登門造訪，以為慢慢傾斟番一兩間，點知一日之內就傾掂咗二十間樓成交，皆在東南亞，一時傳為佳話。
不過從大勢嚟睇，富翁富豪買樓，還是最集中於倫敦。萊坊（Knight Frank）出咗一個財富報告，分析全球嘅富豪（billionaires）流向，發現富豪淨流出最多嘅地區就係中國、俄羅斯、東歐、南歐（包括希臘）與越南，流出嘅意思就係移民／外地置業，淨流入最多嘅城市就係倫敦、紐約、香港，倫敦多香港超過五倍，可見得全球富豪崇拜英國，以倫敦為保存家族財富之最安全陣地，其次就係紐約。跨國公司經紀話俾左丁山聽：「倫敦稅務簡單，不動產法律清晰，世人對英國民主法治有信心，而且倫敦地產服務一條龍，久有傳統，由買樓、租樓、清潔管理維修、收租，有代理公司完全代勞，總之你係富豪有錢找數就得嘞。去曼谷、東京買樓就無此方便！」唔怪得之英文虎報有鬼咁多倫敦樓盤展銷廣告，文華酒店好似個個星期都有倫敦樓盤展銷會，本港本土代理只有羨慕份兒。