好戲在後頭，2000米香港打吡大賽第九場上演，大熱係賢廐「精彩鬥士」，鞍上人雷神呢場之前揸住四win，跑落成為眾矢之的，直路於內欄疑似被田泰安之蔡廐馬「酷男」兩度挨碰封位，嚴重塞車兼被撞，結果收慢過終點，大熱門跑第十一，雷神臨尾舉起左手指指吓，好似好唔忿氣咁！
反觀另一蔡廐新勝馬「戰利品」初跑2000米兼首配潘頓，12檔沿途望空無阻無擋，三叠入彎都有餘力掟甩馬群，首駒衝線成為今年打吡盟主，更一躍成為獎金過千萬名駒，潘頓季內首策蔡廐馬即贏，兼係個人破天荒稱霸香港打吡，連埋第六場贏「正大光明」，佢呢日贏一級賽兼起孖，蔡約翰繼2012年「陽明飛飛」後再奪打吡。
計埋「戰利品」，近15屆打吡清一色由100分或以上馬勝出，其中近兩屆冠軍「威爾頓」同「戰利品」都係1號馬，唔到你唔服！
大摩今年單派「喜蓮歡星」應戰，此駒拉士好遲至望空到，追唔切跑梗頸四，搞到大摩賽後猛同鄉里布文講俄文。除了「戰利品」是韋達棄騎外，呢場跑第二用莫雅之「直震撼」，亦是韋達棄騎，開出一條韋達棄騎Ｑ。
第三、四名「醒目名駒」及「喜蓮歡星」都係冷門，四重彩派55.9萬，冷過冷氣機！全場最心傷都算韋達，佢選策「大印銀紙」，結果只得第五，慘到冇朋友！