蓮花嘅馬杜拿度（圖）係近年炒車王，今站第一個圈都未玩完就已經又出事，俾沙巴嘅拿沙揩到架車而失控撞欄。而拿沙呢位巴西新仔，喺自己嘅F1處子戰就搶到分，仲攞到第五，真係叻仔嘞。
花絮︰阿諾出山
開鑼戰唔算好精采，但大會嘅賽後安排就有驚喜，搵咗荷李活影星阿諾舒華辛力加（左）客串，做主持訪問三位得獎車手。咸姆頓（右）勁興奮，同阿諾同時嗌《未來戰士》嘅名句「I'll be back」，同步到似係預早夾定。
花絮︰新星「殞落」
紅牛二隊嘅十七歲超新星韋特本（左）就冇拿沙咁好彩，呢位史上最年輕車手雖然表現淡定，一路守住得分位置，但換完軚冇耐架車就出煙，搞到黯然退出；喺車房睇住乖仔比賽嘅祖斯韋特本，仲即時黑面走人㖭。
