雖然皇家馬德里今季仲有好多場西甲同歐聯硬仗要踢，但獎盃事小，搵銀事大，佢哋已經提早計劃定今個夏天嘅掘金之旅，對生意佬佩雷斯嚟講，有咩重要過搵錢。據《馬卡報》透露，皇馬已經度好成個行程，其中一站就係早前講好嘅中國，亦都係繼二○一一年後，再次嚟到中國同球迷見面。
七月尾襲廣州上海
皇馬將會喺七月尾分別去廣州同上海踢兩場友賽，雖然未知對手係邊隊，但好大機會係廣州恒大同埋上海申花。第一場表演賽嘅日子，暫定係七月廿七或廿八，而第二場就會係七月三十日。由於佢哋嚟中國前，會喺七月中先去澳洲嘅墨爾本，同羅馬及曼城踢熱身賽，如果我求大俠冇估錯，條路線應該係先去廣州，再去上海，之後就會急急腳飛番歐洲，出席喺慕尼黑舉行嘅奧迪盃，賽程相當頻密。
其實，我求大俠希望皇馬下年可以揀香港啦！話晒自二○○三年「六條A」訪港後，超過十年都冇再遊香江一轉，知唔知香港球迷好掛住你哋㗎？
不過，我就驚中國球迷可能見唔晒佢哋想見嘅球星，基斯坦奴朗拿度或加里夫巴利隨時可能季尾過後，已經唔留喺銀河艦隊。
當中以加里夫巴利離隊機會最大，因為佢上周中踢完對史浩克04場歐聯後，畀球迷當街當巷爆粗問候，搞到好冇癮，有傳如果有英超球會肯出到合理嘅價錢俾皇馬，佢會考慮走人，最大機會嘅收購者當然係曼聯，佢哋手上有皇馬想要嘅門神迪基亞，可以作為交換條件。
C朗被揭同費Sir密斟
至於C朗，英國《太陽報》爆料話佢上周二歐聯後，同去咗睇波嘅費爵爺食晚餐，呢位恩師仲游說佢下季返曼聯，但當然如果曼聯買到巴利，就唔會再打番C朗主意喇。另外，最近有調查發現，C朗係facebook專頁入面，呃到最多like嘅名人，累積咗一億七百萬個支持者，比碧基女友Shakira仲多五千個，睇嚟佩雷斯點都要留住呢位人氣王，先可以保證收入來源。
識睇，一定係睇足英台【英波Live】：
http://soccer.appledaily.com
http://bit.ly/engballlive