巫斯義呢一兩個月停賽多過跑馬，罰完一單又一單，「精彩鬥士」事件上訴失敗，跑埋今日又要停賽15個賽日，傷過傷心人！呢日打吡大日子，阿巫貴為大賽日騎師，第三場四班千四米發威爆吳廐「帶盈來」，取得個人自2月7日以來第一win，佢同吳定強一齊打破羊年齋缽，都算苦盡甘來。賽後馬主晉安團體有位紫裙靚女現身拉頭馬，艷絕凱旋門。
「帶」系馬由韋達主理開，「帶盈來」上仗由佢跑第四，走勢唔曳，13屆冠軍呢場揀騎上次亦由佢入Ｑ之「再石磨藍」無可厚非，「帶盈來」由阿巫接手，跑落人馬交足功課。阿巫沿途將「帶盈來」前置走好位，就此早着先鞭爆出32倍大冷win，人馬齊破悶局，可喜可賀，至於吳定強馬房自1月4日「金珀龍華」後，取得近兩個多月來首捷，壓過孫達志唔使再做包尾大幡，但目前得6win，有排未到15win上岸。
今場二、三名分別由杜利萊「歡樂一生」同郭能「駿穎」拎到，Q、T分別派三千三同六萬蚊，第四名係新牌仔黃皓楠之落飛馬「翡翠寶寶」，四重彩好分到58.6萬，唔知紫裙美女有冇份中呢？