電影《五個小孩的校長》昨日在圓方舉行優先場，主演的楊千嬅帶埋父母及兒子Torres捧場，還有甘比一家、森美、周柏豪、方力申等。散場時，甘比眼濕濕抱住兒子離開，問是否很感動？她說：「係呀，套戲好有誠意，我由頭喊到尾，連我個女都睇到喊。」千嬅父母亦流下眼淚。
Torres睇到攰瞓着
千嬅表示兒子是第一次去戲院睇戲，但由於太攰，所以睡着了，她笑說：「佢知有街去，今朝七點就起身，但見我同工人姐姐都睇到喊，佢就呆咗。」對吳綺莉涉虐兒及藏毒，千嬅一臉驚訝：「吓？唔清楚，唔方便評論。」如果小朋友扭計會否發脾氣？她說：「阿仔得兩歲，未太頑皮同反叛；但就算你打佢手仔，佢都以為同你玩十五二十。其實父母一生都有責任教育子女，所以要有耐性，郁手都無用，係唔好嘅。」她直言小朋友成長速度快，認為講道理及身教更重要，她說：「唔捨得嬲㗎，BB似小情人，好似談情咁，講嘢盡量唔好大聲。」
森美有一子一女，看完電影亦有反思自己是否怪獸家長，他還大讚戲中小演員嘉嘉好戲，建議提名新演員及女配角。對吳事件，他表示無留意，只說：「我曾經幫過防止虐待兒童會拍紀錄片，原來一打（小朋友）已經叫虐兒，嘩！我當時驚一驚想去備案，因為我阿媽以前身邊有乜，攞起手就當武器，𠵱家真係要小心啲。」
據悉《五》劇的幾個優先場反應俱佳，觀眾看完都覺得有意義，有地區工聯會更發起「賞心悅目一天遊」，讓市民可以用百餘元睇戲兼食飯。
採訪：黃曉妍
攝影：沈健程
