呢排啲女馬主有幾旺，淨係睇啱啱禮拜三晚谷戰就知，當晚伍燕梅隻「萬事盛」打開今季勝門；而靚女馬主孫頌欣嘅「綠草如欣」在港初出即爆17倍Win；咁都不特止，最誇張係尾場鄭泳妮名下八歲馬「享耆成」，呢匹老頑童一唔同騎師搞對抗，肯乖乖比賽，立刻半條直路從包尾追上跑第一，唔經唔覺累積9場頭馬，真係贏到你唔信。
咁今期沙田日馬，邊啲女馬主愛駒又值得留意呢？鬥志最強梗係譚毓楨啦，佢做馬主冇耐，就有「精彩鬥士」跑打吡，巨額獎金當前，隻馬上仗香港經典盃應勝而敗，今次勢成熱門，睇怕譚小姐賽前一晚隨時緊張到瞓唔着。
除咗「精彩鬥士」，尾場「方程式」亦好大取勝機會，隻馬上季三捷後轉沉，今季馬主李麗雯好似冇乜聲氣，但其實上月「飛哥」贏馬，雯雯有份拉頭馬，沾一沾朋友旺氣。睇番「方程式」，今次跑1400米冇乜根據實冷，但近兩場先後跑第四，已經顯著回勇試準晒，冠軍騎師潘頓將連續第三次操刀唔放手，梗有佢道理，雯雯隨時繼「飛哥」後，再次現身凱旋門。