甲二勁旅東方噚日喺旺角麥花臣球場上演嘅「麥花臣跨時代」明星籃球關愛邀請賽，由多明尼加國手Maye及NBA溜馬希拔嘅陪練員Anderson領軍，為免對油尖旺區學校聯隊太強弱懸殊，借咗來季先喺甲一出場嘅前鋒Barnes畀對手。不過，七呎高嘅Anderson面對矮一截嘅學生哥照入樽，打完三節後Barnes仲「回歸」東方，結果兩個高佬輪流爆Dunk下大勝74:39。三個外援賽後同球迷合照時表情多多，教練譚偉洋大讚佢哋冇架子，同陣中華將好合拍喎。
除比賽外，噚日場館仲有HK-Kicks及Enterbay嘅珍藏籃球鞋同figure展覽，之後仲向張錦州（圖左起）、宗銘達、張國樑、胡國鋒、梁月明、宋方、吳柱業、翁金驊、李偉倫及冇到場嘅蔡芳裕頒發「十大經典球員」。