今時今日要同球星續約，真係好似娶港女咁，又要講心又要講金；好似英超嘅利物浦，出到三倍人工希望留住二十歲翼鋒史達寧，不過史達寧呢位少爺仔恃住有傳豪門皇家馬德里同拜仁慕尼黑想簽佢，就梗係吊高嚟賣，一口拒絕之餘，仲話要到季尾睇定啲先再傾。
傳皇馬拜仁有意搶人
史達寧上季喺英超打起，邊線不斷快放，貢獻唔少助攻畀前鋒蘇亞雷斯同史杜列治，更因此被稱為「3S」組合，史達寧亦都晉身英格蘭大國腳；紅軍其實都好識做，即刻畀張三萬五千鎊（約四十萬港元）周薪嘅長約佢，雖然以英超強隊嚟講，唔算特別好高人工，不過以一個十九歲𡃁仔嚟講都認真唔錯。
過百萬周薪都嫌少
到今季紅軍戰績有所下滑，講真史達寧係就係把握力強咗，聯賽累積六個入球同謝拉特並列球隊首席射手，不過球路變化唔多，已經開始俾對手盯死，但紅軍都願意出到十萬鎊周薪（約一百一十四萬港元）續約，史達寧都say no，話要等季尾先再傾喎。係就係有傳過皇馬同拜仁想買史達寧，不過佢波底真係麻麻，單靠速度，去到皇馬同拜仁真係唔夠班，我求大俠都幾懷疑呢單轉會傳聞真定假，而且紅軍𠵱家仲爭緊前四，下季唔好彩冇得踢歐聯，少一筆大收入，畀高薪都未必咁疏爽，所以史達寧呢次跳草裙舞真係好勇。
成隊紅軍又唔係只得史達寧跳草裙舞，連中場佐敦軒達臣都係；雖然利物浦一心以為軒仔會接替謝拉特做新任隊長，不過軒仔講明自己下季都未必係隊長，而且又拒絕咗球會開出八萬鎊（約九十一萬港元）周薪嘅新約，而且軒仔一六年就合約到期（見附表），紅軍更加擔心。另外，格連莊臣同高路托尼兩位後防老將今季季尾就約滿，球會仲未同佢哋搞掂續約，睇怕都似季尾走人。
周一先喺英超作客鬥史雲斯嘅利物浦，領隊羅渣士似乎冇因主力跳草裙舞影響心情，講到明史達寧邊度都唔會去，有信心佢留隊，上周五仲同新女友莎樂去睇Lionel Richie喺利物浦市開嘅演唱會，仲去到後台搵人合照㖭。