今日沙田有大賽，勢必哄動，各位馬迷入場要趁早，事關重頭戲在第9場打吡大賽，只限4歲馬參加，歷來贏得打吡嘅，都有資格登上馬王寶座，例如2014年冠軍威爾頓、2013年事事為王、2011年雄心威龍、2006年爆冷、2005年爪皇凌雨等等。當然亦有霎眼嬌嘅，例如2012年陽明飛飛、2010年極品絲綢、2009年閒話一句等，都係贏完打吡之後，即走下坡，以後難復雄風。
自1979年資料計起，歷來只有一位馬主能夠贏過兩次打吡，其他都係一次過，呢位有運馬主就係榮智健（1997奔騰，2002奧運精神），但自此之後，「運氣配額」似乎係咁先，佢嘅事業與養馬生涯愈來愈低調。以家族計，則胡家（胡兆熾後人）有運贏過兩次，即1993年喜蓮之星（馬主胡寶星與張惠慶），2008年喜蓮福星（胡寶星四位公子），今日胡寶星爵士夫人及公子胡家驊胡家驃擁有嘅喜蓮歡星有份出戰打吡，且看是否可以第三度奪標。
贏過打吡嘅中大MBA校友簡文樂（1996先見之明）今日例牌包下沙田會所六樓，招待駐港外交官及各方友好觀賞打吡，又有其他科技驗身玩意，總之Paul簡請客，不愁沉悶，左丁山有排玩。玩還玩，最緊要買中邊隻馬贏打吡。今年確實係幾難揀馬嘅，十四隻馬之中，有過本港2000米路程賽績嘅，只有9號直震撼，11號勁趣，有外地2000米賽績嘅有3號酷男，6號精彩鬥士，8號喜蓮歡星，14號王者無敵，其他馬只有1800米或以下嘅取勝紀錄。點選馬呢？似乎應該以6號精彩鬥士（騎師莫雷拉）為首選，但如果成為一面倒大熱門，咁又唔值得博。跟住係一個月前贏過2000米嘅11號勁趣及輸俾勁趣嘅9號直震撼，韋達因為要騎內地大富豪潘蘇通嘅4號大印銀紙而放棄直震撼，馬主李子彬立即請更高水平嘅世界級騎師莫雅來港出征，可見決心。潘蘇通有大把銀紙，一擲百萬，面不改容，搵來超級騎師蘇銘倫騎另外一隻14號王者無敵，可見內地富豪面子第一。
另外三隻有機會嘅馬係1號戰利品，馬主係壹傳媒獨立非執董霍廣行，全場馬以佢評分最高，雖無長途賽績，而韋達亦不選騎，感情上投佢一票，莎莎郭隻2號美麗大師，全年以贏打吡為目標，3號酷男亦然，不能忽視，咁多隻馬點落注，真頭痛，左思右想之下，決定以6號精彩鬥士做膽，拖1號戰利品，2號美麗大師，3號酷男，4號大印銀紙，11號勁趣。四重彩冷腳拖埋10號醒目名駒。